Монгол Улсын Засгийн газраас зарласан 2023-2025 онд хэрэгжүүлэх “Монголд зочлох жил” аян, Иргэний нисэхийн салбарын “SEAMLESS AVIATION-2030” дунд хугацааны стратеги төлөвлөгөөнд тусгасан “META GENERATION” бодлогын хүрээнд болон Монгол Улсад нисэх хүчин үүсэж хөгжсөний 100 жилийн ойг угтан салбарын ажилтнуудын англи хэлний мэдлэг, хэрэгцээг тодорхойлох, багаар ажиллах ур чадварыг сорих зорилгоор “Best in English” англи хэлний тэмцээнийг 2024 оны 11 дүгээр сарын 22-ны өдөр зохион байгууллаа.
Тэмцээний үйл ажиллагааг нээж Иргэний нисэхийн үндэсний төвийн Үйлдвэрлэл үйлчилгээ хариуцсан ерөнхий менежер Э.Энхмөнх болон Нисэхийн сургалтын төвийн Захиргаа, олон улсын сургалтын хэсгийн менежер М.Тамир нар үг хэлсэн юм.
“BEST IN ENGLISH” тэмцээнд ИНҮТ-ийн алба салбаруудын ажилтнуудын нийт 8 баг тус бүр 6 хүний бүрэлдэхүүнтэй ур ухаан, бүтээлч санаа, англи хэлний мэдлэг чадвараа сорин багийн мэндчилгээ, багын ахлагчдын тэмцээн, үг таах, үгийн гинжин урвал, англи дуу дуулах, өгүүлбэрийн бүтцийн алдааг олох гэсэн 6 үе шаттайгаар өрсөлдөж, шүүгчээр манай улсад ажиллаж буй Олон Улсын байгууллагын ажилтан Жүэл Кашэ, Alpha Aurora Aviation ХХК-ийн нислэгийн үйл ажиллагааны захирал Дэвид Эдуардс, олон улсын TESOL зэрэгтэй англи хэлний багш Х.Нинж-Эрдэнэ нар ажиллаж багуудын тэмцээний даалгаврын гүйцэтгэлээр оноо өгч, Үйлдвэрлэл үйлчилгээний газрын Г.Нямбат ахлагчтай “Nexus” баг 1-р байр, Холбоо навигаци, ажиглалтын албаны Ж.Болорчимэг ахлагчтай “Avengineers” баг 2-р байр, Нисэхийн мэдээллийн үйлчилгээний албаны Ө.Мичидмаа ахлагчтай “AIS” баг 3-р байр тус тус эзэлж батламж, мөнгөн шагнал, Х.Нинж-Эрдэнийн зохиосон “Хэн ч англи хэлийг төгс эзэмшиж чадна” ном болон Alpha Aurora Aviation ХХК-ийн зүгээс тэргүүн байрын эздэд тусгай шагнал гардууллаа.
Түүнчлэн тус тэмцээний үеэр хөгжөөн дэмжигчдийн дунд зохион байгуулагдсан “Spelling Bee” хөгжөөнт тэмцээнд ИНҮТ-ийн алба салбаруудын 50 гаруй ажилтан идэвхтэй оролцож, тэргүүн байранд НХҮА-ны аэродромын нислэгийн удирдагч Д.Энхдүүрэн түрүүлж, Хамтын ажиллагааны хэлтсийн мэргэжилтэн Б.Алтанзул, Бизнес хөгжил төлөвлөлтийн газрын менежер Д.Одгэрэл нар удаах байруудыг эзэлсэн.
Мөн Иргэний нисэхийн үндэсний төвийн алба салбаруудын ажилтнуудын англи хэл сурах сонирхлыг дэмжих зорилгоор англи хэлний сурах бичиг болон дэлхийн сонгодог уран зохиолын номын үзэсгэлэнг зохион байгууллаа.
