Монгол Улсад Нисэх хүчин үүсэж хөгжсөний 100 жилийн ойг угтан нисэхийн салбарын тухай өгүүлэх олон ангит киноны бэлтгэл ажлууд хийгдсээр байна. Тус киног бүтээхэд дэмжлэг үзүүлэх Ажлын хэсгийн дарга Р.Амарбаясгалан, “Номадиа Пикчерс Продюсинг” ХХК-ийн ерөнхий продюсер Б.Наранбат нар өнөөдөр “МИАТ” ТӨХК-ийн удирдлагуудтай уулзаж, олон ангит киноны агуулгыг танилцуулж, хамтарч ажиллах боломжийн талаар санал солилцлоо.
“МИАТ” ТӨХК-ийн Гүйцэтгэх захирал Б.Мөнхтамир боломжит бүх хэлбэрээр дэмжиж хамтарч ажиллана гэдгээ илэрхийллээ. 16 ангитай байхаар төлөвлөж буй олон ангит кинонд нисгэгч, бүхээгийн үйл ажиллагааны ажилтан гээд гол дүрүүдээр дамжуулан авиа компанийн үйл ажиллагаа, ажил мэргэжлүүдийн онцлогийн талаар багагүй харуулах юм.